दुष्काळी परिस्थितीवर कायमस्वरूपी मात करण्यासाठी उस्मानाबाद जिल्ह्यातील रांजणी येथील नॅचरल शुगर ऍण्ड अलाईड इंडस्ट्रीजतर्फे (एन-साई)जलसंधारणाची कामे हाती घेण्यात आली आहेत. घारगाव, शिराढोण, ताडगाव व रांजणी येथे नॅचरल जलसंधारण योजनेअंतर्गत समतल पाझर तलाव, नाला रुंदीकरण व खोलीकरणाचे काम प्रगतिपथावर आहे. या कामाची पाहणी महाराष्ट्र सिंचन सहयोगाचे अध्यक्ष डॉ. दि. मा. मोरे यांनी नुकतीच केली. मराठवाड्यात उद्भवलेल्या दुष्काळी परिस्थितीच्या पार्श्वभूमीवर हाती घेण्यात आलेले हे काम उपयुक्त आणि प्रेरणादायी असल्याचे मोरे यांनी सांगितले. ‘एसाई’ चे अध्यक्ष बी. बी. ठोंबरे म्हणाले की, कोणत्याही इष्ट आपत्तीचे संधीत रूपांतर करून त्यावर मात करण्याची मूळ संकल्पना आम्ही पूर्वीपासून प्रत्यक्ष अमलात आणली असून यावर्षी उद्भवलेल्या दुष्काळी परिस्थितीवर कायमस्वरूपी मात करण्यासाठी आम्ही हा उपक्रम हाती घेतला आहे.